Rusiyalılar yay tətilini harada keçiriblər?

Ümumrusiya İctimai Rəyin Öyrənilməsi Mərkəzi (VCIOM) rusiyalıların bu il yay tətilini harada keçirməsi ilə bağlı sorğu keçirib.

Son illərdə epidemioloji məhdudiyyətlər və qeyri-müəyyən siyasi vəziyyət səbəbindən xaricdə tətillər getdikcə daha əlçatmaz olub. Pandemiyadan əvvəl, 2019-cu ilin yayında rusların 8%-i xaricdə istirahət edirdi, 2020-ci ildə koronavirus məhdudiyyətlərinin pik olduğu vaxtda bu rəqəm demək olar ki, sıfıra enib. 2021-ci ildə isə xaricdə istirahət edənlərin göstəricisi 13%-ə çatıb. Bu yay rusiyalıların 2%-i faizi başqa ölkədə dincəlib. Bu qrupda ən populyar istirahət yerləri Türkiyə (34%), Abxaziya (14%) və Qazaxıstandır (11%). Xaricə səfər edənlərin 7%-i Taylanda, 5%-i Misirə, 4%-i Birləşmiş Ərəb Əmirliklərinə və Ermənistana səfər edib.

 

Bu yay rusların 16%-i tətilini Rusiyanın başqa şəhər və ya regionlarında keçirib, bu, 2018-ci ildən bəri ən yüksək göstəricidir. Onların 7 %-i Krasnodar diyarının kurortlarını gəzib , daha 2%-i isə Krımda istirahət edib. Rusiyanın başqa şəhər və ya regionunda istirahət edənlər daha çox Sankt-Peterburq və Moskvaya səfər etməyi (hər biri 11%) seçiblər. Rusiyada istirahətin üstünlükləri arasında respondentlərin 19 %-i ilk növbədə gözəl təbiəti, təmiz havanı, iqlimi, 17%-i isə yaxşı hava şəraitini və isti yaydan razı qaldıqlarını qeyd ediblər. Aktiv istirahət və canlı emosiyalar tətilini ölkənin başqa şəhər və ya bölgəsində keçirənlərin 13%-ni heyran edib. Onların 9%-i isə isti dənizi, təmiz çayları və maraqlı görməli yerləri vurğulayıblar.

 

Rusiya daxilində istirahət edənlərin 28%-i bəyənmədikləri nəyinsə olmadığını bildirib.  Narazılığın əsas amilləri isə mənzil, yemək və istirahətin özünün yüksək qiymətləri olub (17%). Hər on nəfərdən biri pis hava şəraiti, həddindən artıq isti, təbii fəlakətlər və həşəratlarla üzləşib (10%). Zəif nəqliyyat infrastrukturu (6%), aşağı xidmət (5%), çirkli şəhərlər və çimərliklər (4%) Rusiyada istirahətlə bağlı xoşagəlməz təəssürat yaradıb.

Şəfanə İbrahimova