Yuxarıya
skip to main content

Müasir uşaqları nədən qorumaq lazımdır? - SORĞU

06.06.2022

Ümumrusiya İctimai Rəyin Öyrənilməsi Mərkəzi (VCIOM) uşaqların müdafiəsi ilə bağlı rusiyalılar arasında  sorğu keçirib.

Sorğunun nəticələrinə görə, rusların yarıdan çoxu əmindir ki, indiki uşaqlar onlardan daha təhlükəli dövrlərdə yaşayırlar (58%). Digərlərindən daha çox qadınlar (64%) və pensiya yaşında olan respondentlər (69%) belə düşünürlər.

Uşaqlar üçün təhdidlərin önündə kompüterlər və qadcetlər ( texniki cihazlar: smartfonlar, planşetlər, pleyerlər və s) gəlir. Rusların fikrincə, müasir valideynlər uşaqlarını ən çox bu qurğulardan qorumalıdırlar (57%). Respondentlərin 43%-i narkotiklərdən istifadə təhlükəsini göstərib.  Sorğu iştirakçlarının 39%-i isə həmyaşıdlarının aqressiya və sərtliyinin zorakılıq problemi kimi təhlükə ola biləcəyini düşünürlər. Hər üç rusdan biri ailədən, valideynlərdən lazımi diqqət, qayğı almamağı uşaqların əsas problemlərindən sayır (33%). Təxminən bənzər sayda respondentlər isə uşaqlar üçün alkoqolun və siqaretin təhlükələrinə diqqət çəkirlər (28%).

Rusların müasir uşaqlarla bağlı yüksək narahatlıqlarına baxmayaraq, respondentlərin 62%-i onların küçədə asudə vaxtlarını təhlükəsiz şəkildə keçirmələri üçün yaşadıqları yerdə lazımi şəraitin yaradıldığını qeyd edib.  Bu fikri daha çox Moskva, Sankt-Peterburq sakinləri (72%) və 18-24 yaşlı respondentlər söyləyiblər.  Yaşayış məntəqəsinin böyüklüyü də bu göstəriciyə təsir göstərir: kənd yerlərində gəzintilər daha təhlükəsiz hesab olunur (64%), böyük  və əhalisi çox olan şəhərlərdə isə gəzinti üçün şərait daha təhlükəli kimi qiymətləndirilir (37–39% respondent təhlükəsiz hesab edir).

“Dünənki uşaqlar" – 18-24 yaşındakılar uşaqların problemləri ilə bağlı fərqli danışırlar. Onların fikrincə, ən böyük təhlükə narkotikdir (53%). Ondan sonrakı yerlərdə isə həmyaşıdların zorakılığı və təcavüzü (46%), spirtli içki və tütün istifadəsi (44%) gəlir. Ağıllı telefonlarsız, internetsiz böyüyən yuxarı yaşlılar isə (35-59 yaş arası) uşaqlar üçün əsas təhlükə kimi kompüterlər və qadcetləri  görürlər (62-65% ).

Rusların uşaqlarla bağlı dəstəklədiyi üç sahədən biri idman və sağlam həyat tərzinin inkişafıdır (50% ).  Respondentlərin 33%-i vətənpərvərlik proqramlarının hazırlanmasını önəmli sayır, 27%-i faizi isə onları zərərli informasiyalardan qorumağın vacibliyini vurğulayır.

Gənclər daha çox uşaqlar üçün ekoloji maarifləndirmənin (18-34 yaşlılar qrupunda 26-25%) və valideyn dəstəyinin (18-24 yaşlılar arasında 25%) önəmindən danışırlar.

Yaşlı qrup isə (45 yaşdan yuxarı) vətənpərvərlik təribiyəsinə (39%) və uşaqların tərbiyəsində məktəblərin rolunun artırılmasına diqqət çəkirlər (24-25%).


Mənbə: https://wciom.ru/analytical-reviews/analiticheskii-obzor/ot-chego-nuzhno-zashchishchat-sovremennykh-detei